ZARAGOZAKO KLIMOGRAMA

Hor daukazue liburuko 74.orrialdean dagoen Zaragozako klimogramaren adibidea!

Oharra: goiko irudiko datuak ez dira liburuan datozenen berdin-berdinak, baina horri kasurik ez!. Iruzkina egiten ikasteko berdin zaigu eta.

Aurrean daukagun grafikoa, Klimograma bat da. Bertan, leku bateko urtean zehar izandako prezipitazioak (barraz), eta hile guztietako bataz besteko tenperaturak (marraz) adierazten dituen grafikoa da.

Klimograma honetan urteko prezipitazioak (325mm) eskasak dira 800 eta 300 mm. bitartean daudelako. Ia oso eskasak dira zeren klima esteparioan 300 mmtik behera baitira. Prezipitazioen banaketa oso irregularra da 8 hilabete lehorrak direlako. Lehortasunean erreperatuz gero, honek  tenperaturen eta prezipitazioen arteko erlazioa adierazten du, klimograma honetan  Gaussen indizearen arabera (hilabete bateko bataz besteko tenperatura bikoitza prezipitazioak berdin edo handiagoak badira orduan hilabete lehorra da) lau hilabete lehorrak dira (ekainetik irailara arte; Gaussen indizea betetzen da eta tenperaturen kurba prezipitazioen azpitik dago).Horrekin batera, neguan hilabete batzuetan 30mm azpitiko prezipitazioak ematen dira. Guzti honek, seguraski esan nahi du klima erdilehor muturrekoa edo esteparioa dela. Prezipitazioen banaketan ere ikusten da maximo ekinokzialak dituela baina udaberrikoa da garrantzitsuena (maiatza urte osoko hilabeterik euritsuena) eta udazkenean urria da hilabeterik euritsuena.

Zer dela eta izan daitezke prezipitazio hain urriak? Penintsulan faktore garrantzitsuenetako bat klima barietateak izateko erliebea da. Erliebea, penintsulan, kostarekiko paralelo aurkitzen da, hori dela eta ozeanotik (mendebaldetik) sartzen diren borraskek haizaldean prezipitazioak sortzen dituzte eta penintsularen barrualdera oso ahulduta heltzen dira. Udan, Azoreetako Antizikloia penintsularen parean kokatzen da bere eragina oso nabaria denez penintsula osoan, eguraldi egonkorra eta ia prezipitaziorik gabekoa ekartzen du. Neguan, lurzoruaren hozketak antizikloi termikoaren egoerak indartzen ditu, hori dela eta eguraldi egonkorra maiz suertatzen da  prezipitazioak oso urriak direlarik (urtarrila, otsaila), gero neguko antizikloia desegiten denean Fronte Polarrak ozeanotik bidaltzen dituen borraskak sar daitezke udaberriko prezipitazioak sortuz. Udazkeneko prezipitazioak ez dira hain garrantzitsuak zeren Genovako Golkoan antolatzen diren borrasken prezipitazioak kostaldean sortzen dira eta barrualdera guztiz ahulduta heltzen dira, erliebearen eragina dela eta.

 

Tenperaturak aztertzen baditugu, udako tenperatura, abuztuan 23,7-ºC -koa da, hau da uda beroa 22ºC-tik gorakoa delako. Neguko tenperatura, bestalde, 6ºCkoa, hau da, negu hotza. Tenperatura horiek direla eta urteko tenperatura bitartea 17ºC-koa da eta oso altua kontsidera daiteke  barrualdeko klima bati dagokiola adieraziz.

 Ezaugarri termiko hauek eta prezipitazioen ezaugarriek eramaten gaitu  pentsatzera klima honek barrualdeko kokapena daukala  baina Ipar Mesetan egoteko uda  beroegia dauka, bestalde klima erdilehorra muturrekoa edo estepakoa denez  baina negu hotzarekin, klima honen kokapen posibleak izango ziren Albacete edo Ebroko sakonunea, baina Albaceteko uda beroagoa da, beraz Ebroko sakonunearen erdiko klima izan behar du, leku hori erliebez inguratuta dagoenez prezipitazioak oso urriak direlako.

Klima mota honi, lehortera egokitutako  landaretza dagokio: zuhaitzik ez da agertzen. Zuhaixka arantzatsuak,  espartzua eta estrepa agertuko dira. Ibaiak emari gutxiko, erregimen irregularreko eta udako agorraldi nabarmenekoak izango dira.