INMIGRAZIOAREN INGURUKO ALBISTEA LANTZEN

Istiluen aurkako materiala erabili zutela onartu du Fernandez Diazek

2014/02/13

ITURRIA:www.eitb.com

Gutxienez 11 pertsona itota hil ziren joan den otsailaren 6an, Marokotik Ceutan sartzeko saiakera masibo batean. Gertakariari buruzko azalpenak eman ditu ostegun honetan, Kongresuan, Jorge Fernandez Diaz Barne ministroak. Hain zuzen ere, 400 etorkin inguru saiatu ziren Espainian barrena egiten.

Fernandez Diazek Guardia Zibilak istiluen aurkako materiala erabili zuela onartu du, baina, ministroaren esanetan, egindakoaren eta heriotzen arteko "kausa ondorio efekturik ez dago".

Azalpenak emateko eskaera ministroak berak egin zuen arren, PSOE, Izquierda Plural, UPyD eta Talde Mistoak ministroaren premiazko agerraldia eskatu zuten, batez ere etorkinen sarrera ekiditeko erabili zituzten istiluen aurkako materialari buruz argitaratu den informazioa argitzeko. Diazek Guardia Zibilak egin duen txostena irakurri du Kongresuan egin duen agerraldian.

Ministroak azaldu duenez, "jaurtiketa guztiak lurretik egin ziren" eta "gutxienez, 25 metroko distantziara". Gainera, gomazko pilotak "Espainiako uretan jaurti ziren beti, etorkinak zeuden lekutik urrun" eta, "zauriturik gabe, horietako gehienek saiakera bertan behera uztea lortu zuten".

"Gure helburua ez zen inoiz etorkinak zauritzea izan, disuasio-hesi bat sortzea baizik", argitu du.

Guardia Zibilaren txostenaren arabera, Espainiako uretan "ez zen zauriturik edo biktimarik izan", eta baieztatutako hamaika heriotzak Marokoko uretan izan ziren. Espainiako uretan berreskuratutako bi hilotzei buruz, autopsiak itota hil zirela baieztatu duela esan du ministroak.

Kongresuan egin duen bigarren agerraldian, ministroak adierazi du etorkinen bizia arriskuan zeudela ikusi zutenean, Guardia Zibilak pilotak botatzeari uzteko agindua eman zuela.

 

Euskal herritarren ustez, etorkinak ez dira beharrezkoak lan merkatuan

2014/03/10

ITURRIA:www.eitb.com

Krisia hasi aurretik, 10 herritarretatik zortzik kontrakoa esan zuten Immigrazioaren Euskal Behatokiak urtero egiten duen inkestan. 
Euskal Autonomia Erkidegoan jaio eta bizi diren herritar gehienek (% 43,9) uste dute etorkinak ez direla beharrezkoak lan-merkatuak dituen beharrak asetzeko. Krisia hasi aurretik, 10 herritarretik zortzik kontrakoa esan zuten Ikuspegi Immigrazioaren Euskal Behatokiak urtero egiten duen inkestan. Behatokiak iaz egindako ikerketaren ondorioak gaur eman dituzte jakitera.

Adina, diru-sarrerak eta sinesmenen arabera, jarrera toleranteagoak edo itxiagoak nabarmendu ditu aipatu ikerketak euskal herritarren artean. Adibidez, paperak izan ala ez, hezkuntza eta osasun arretarako eskubidea dutela iritzi dio herritarren gehiengoak, baina ez du gauza bera pentsatzen gizarte laguntzei dagokienez.

Horrez gain, herritarren iritziz, integratzeko ahalegina "etorkinei dagokie", txostenaren datuen arabera.

Hala ere, euskal gizartearen gehiengoarentzat immigrazioa ez da jada arazo. Langabeziak, krisi ekonomikoak, klase politikoak edota ustelkeriak kezka handiagoa eragiten dute, Gorka Moreno, Ikuspegiko zuzendariaren esanetan.

Krisi ekonomikoak "lotura zuzena" dauka gizarteak etorkinei buruz duen iritziarekin. Krisia hasi aurretik herritarren % 80k uste zuen lan-merkaturako beharrezkoak zirela, baina orain % 35ek soilik du iritzi hori.

Zaintza lanetarako etorkinak kontratatzen dira, baina, oro har, baldintza txarretan, ikerketaren arabera. Bizikidetzari dagokionez, herritarren gehiengoak uste du etorkinak direla bertako ohituretara egokitu behar dutenak.

  Behin goiko albisteak irakurri ondoren, bietako bat aukeratu eta hemengo gidoiaren arabera testua landu:

1- TESTUAREN SAILKAPENA

-Dokumentu mota eta helburua

-Iturria

-Data

-Jasotzailea

2- TESTUAREN ANALISIA

-Testuaren gai nagusia

-Laburpena

-Zure iritzia eman